ସୂର୍ଯ୍ୟବଂଶୀ ସୂରଜ ସ୍ଥିତପ୍ରଜ୍ଞ
ହସିବାର ଅଦମ୍ୟ ଅଭିଳାଷ
ଆଜି ଚିର ପ୍ରଶମିତ
ଛାତି ଭିତରେ ଧକ୍କା ଖାଉଥିବା
ଅଜଣା ଢେଉର ଆକ୍ରୋଶରେ
ଆକ୍ତାମାକ୍ତା ଏ ଜୀବନ
ପୁନେଇଁ ଚାନ୍ଦର
ଆତ୍ମୀୟତାର ହସ ଅବା
ଅଭିସାରିକାର କପଟୀ ହସ
ଆଜି ମୋ ପାଇଁ
ସବୁକିଛି ନିରସ
ହସି ହସାଉଥିବା ଏ ମନ,
ଆଜି କନ୍ଦାକଟାର କୁଟିଳ
ପରିସୀମାରେ ଆବଦ୍ଧ,
କଣ୍ଟାବାଡ଼ ଘେରା ଏ ଜୀବନରେ
ହସ ଆଜି କ୍ଷତାକ୍ତ
ହସଟିଏ ଫେରି ପାଇବାର ଇଚ୍ଛା,
ଆଜି ଅପୂରଣୀୟ
ହେଲେ,
କଣ ପାଇଁ ଏ ସବୁ ?
ଦିଲ୍ଲୀର ଦାମିନୀ ପାଇଁ ନା,
ପିପିଲିର ବବିନା ପାଇଁ ?
ଦି ଟଙ୍କିଆ ଚାଉଳରୁ ଦି’ଶ ଟଙ୍କିଆ
କମ୍ବଳର ରାଜନୀତିରେ
ଅପହୃତ ମୋ ହସ |
କେହି କହିବ କି,
କାହାର ନିର୍ବାଚନୀ ଇସ୍ତାହାରରେ
ଅଛି ଯୋଜନା,
ଚେନାଏ ହସ ପାଇଁ ?
ନା,
ସୀମା ଆରପାରିକୁ
ଭାରତୀୟ ଯବାନ୍ର କଟାମୁଣ୍ଡ
ସହ ଚାଲିଯାଇଛି ମୋ ହସ ?
0 Response to "ହସ ଖୋଜେ ମଣିଷ"
Post a Comment